სიახლეები
კრწანისის ტყეპარკში 30 ფრთა კოლხური ხოხობი გაუშვეს
ხოხბების გაშვება საქართველოში მიმდინარე ფარიკაობის მსოფლიო ჩემპიონატთან დაკავშირებული პროექტის „ფარიკაობა პლანეტისთვის” ფარგლებში განხორციელდა.
ღონისძიების ორგანიზატორები იყვნენ გარემოს დაცვისა და სოფლის მეურნეობის სამინისტროს ველური ბუნების ეროვნული სააგენტო, ფარიკაობის საერთაშორისო და საქართველოს ფარიკაობის ფედერაციები.
ხოხბების გაშვების პროცესში ბიომრავალფეროვნების და სატყეო დეპარტამენტის უფროსი კარლო ამირგულაშვილი, ველური ბუნების ეროვნული სააგენტოს უფროსი რევაზ ბეჟაშვილი, საქართველოს სპორტის სამინისტროს სპორტის დეპარტამენტის უფროსი ირაკლი დოლაბერიძე და ფარიკაობის საერთაშორისო ფედერაციის ვიცეპრეზიდენტი ტამას ჰენრიეტი მონაწილეობდნენ.
კოლხური ხოხობი საქართველოს ველური ბუნების უძველესი ბინადარია. კოლხური ხოხობის პოპულაციის გაზრდა ადგილობრივი ველური სახეობის ფაუნის გამრავლების და ბუნებაში აღდგენის პროექტის ერთ-ერთი მნიშვნელოვანი ნაწილია. 2016 წლიდან ველური ბუნების ეროვნული სააგენტო ახორციელებს პროექტს, რომელიც ადგილობრივი ველური ბუნების ფრინველების შემცირებული პოპულაციის აღდგენას გულისხმობს. ისეთი როგორიცაა, კოლხური ხოხობი გნოლი, კაკაბი, პორფირიონი. პროექტის ფარგლებში, ველური ბუნების ეროვნულმა სააგენტომ კოლხური ხოხბის საწიწილე მეურნეობა მოეწყო. მეურნეობა მოიცავს ბუნებასთან ინტეგრირებულ ვოლიერებს და საინკუბატორო-საწიწილე ნაგებობებს, სადაც კოლხური ხოხობის გამრავლება ხდება.
