სიახლეები
მდინარე ჩაქვის წყლის შენაკადები 30 000 ცალი ნაკადულის კალმახის ლიფსტით დაათევზიანდა
დათევზიანების პროცესში, ველური ბუნების სააგენტოს უფროსი რევაზ ბეჟაშვილი, გარემოს დაცვისა და სოფლის მეურნეობის სამინისტროს, მათ შორის, ბიომრავალფეროვნებისა და სატყეო დეპარტამენტისა და დაცული ტერიტორიების სააგენტოს წარომადგენლები მონაწილეობდნენ.
ნაკადულის კალმახის ქვირითისა და ლარვის ველურ ბუნებაში გაშვება არის მეთოდი, რომელიც ხელს უწყობს, ადამიანის მინიმალური ჩარევით, მოწყვლადი სახეობის მომრავლებას და მაქსიმალურად ზრდის ბუნებრივად გამოჩეკვის პროცესს.
2016 წლის სექტემბრიდან, გარემოს დაცვისა და სოფლის მეურნეობის სამინისტროს სსიპ ველური ბუნების ეროვნული სააგენტო ახორციელებს პროექტს, რომელიც საქართველოში „წითელი ნუსხის” სახეობის ნაკადულის კალმახის გამრავლებას ითვალისწინებს. სააგენტოს გეგმა წელიწად-ნახევარში არანაკლებ მილიონი ლიფსიტის წარმოება და მდინარეების გათევზიანებაა.
ნაკადულის/მდინარის კალმახი 2006 წელს „წითელ ნუსხაში“ მოხვდა. მას მინიჭებული აქვს მოწყვლადის კატეგორია. მსგავსი ტენდენცია ევროპის არაერთ ქვეყანაშია, რის გამოც პოპულაციის ხელოვნური გამრავლება და მდინარეთა დათევზიანება ხდება. ნაკადულის კალმახი "წითელი ნუსხის" ბინადარია. მისი დაჭერა დაშვებულია მხოლოდ რეკრეაციული თევზჭერის "დაიჭირე და გაუშვის" პრინციპით.
